بازرگانی ڤینیسیا
دواین نوێکردنەوە: 2026-05-13
دەقێکی شانۆییە، نوسینی (شکسپیر)ە. وەرگێڕانی بۆ کوردی (ع. ع. شەونم) و پێداچوونەوەی مامۆستا حەمەلاو بەرزنجی. ئەم شانۆییە یەکەم کاری هونەرییە ساڵی ١٩٥٦ز لەسەر تەختەی شانۆ پێشکەشکرابێت. جگە لەکاری دەرهێنان، کاری هونەری تری وەک دیکۆر و مکیاجی لەلایەن مامۆستا شەونمەوە بۆکراوە. کۆمەڵێک قوتابی نمایشەکەیان ئەنجامداوە. لەوانە (جەمالی مەلا قادر -ڕۆڵی شایلۆک) و (عبدولڕەحمانی حسێنی نانەوا -ڕۆڵی بەسانیۆ) و (موعتەسەم ڕەش- ڕۆڵی برادەری ئەنتۆنیۆ)یان پێدراوە. هەروەها لەکاتی گۆڕینی دیمەنەکاندا، سروود و گۆرانی ڕاییکراوە. شیعر و ئاوازی گۆرانییەکان مامۆستا شەونم دایناون و بۆ ئەو پێشکەشکردنەیان، کۆرسێکی ٢٠ کەسی لە قوتابیانی کوڕ و کچ پێکهێناوە. بینەر لەڕێی بلیتەوە شانۆگەریەکەی بینیووە. بەمەش توانراوە تێچووی دروستکردنی شانۆکە دەربهێنرێتەوە.
سەرچاوەکان:
- هەڵەبجە لە ئامێزی مێژوودا، حەکیمی مەلا ساڵح، بەرگی چوارەم، (شانۆ-مۆسقا) چاپی یەکەم، چاپخانەی ڕۆژهەڵات، هەولێر، ٢٠١٤، ل١٢٩.
- گۆڤاری (ڕامان)، ژمار (٦١)ی ساڵی شەشەم، هەولێر، ٥ی ٧ی ٢٠٠١، ل٨٠.
- چیرۆکەکانی شار، کۆچەر میرزا، کتێبی سێیەم (مێژووی شانۆ لە هەڵەبجە)، چاپی یەکەم، چاپخانەی ڕێدار، ٢٠٢٢، ل١٧-١٨.
ئامادەکردنی: هومایون ساحیب کەریم