دواین نوێکردنەوە: 2026-05-13
خاڵێکی سەرسنوری نافەرمییە لە نێوان باشور و خۆرهەڵاتی کوردستاندا. کەوتووەتە ناو گوندی (پشتە)ی سەر بە شارۆچکەی (بەمۆ). ڕۆژانە بارهەڵگرەکان ئاڵوگۆڕی شتوومەکی لێ دەکەن و بووە بە سەرچاوەی داهاتیان.
ئامادەکردنی: عەفان ئەحمەد عەلی
کەوتووەتە سنوری گوندی (قوڵمیتکان) لە نێوان هەرێمی کوردستان و خۆرهەڵاتی کوردستان. بۆ یەکەمجار لە ساڵی ١٩٤٦ کراوەتەوە. خەڵکی گوندی (قوڵمیتکان) و هەڵەبجە و زۆربەی گوندەکانی (هەڵەبجە) سودیانلێوەرگرتووە. هەتا سەرەتای شەستەکانی سەردەی ڕابردوو کراوە بووە. بە هۆی بوونی ئاوی ڕووباری سیروان، کە لەچەمێکی گەورەدا تێپەڕ دەبێت و بووەتە سنوری جیاکەرەوەی هەرێم و خۆرهەڵات، بۆیە ئەوکاتانەی، کە ئاو زیادی کردووە، بە گوریس کاڵاکانیان هەڵدەواسی و لە ئاو دەیانپەڕاندەوە. ئەو کاتیش ئاو کەم بووە، بەناوی ئاوەوە بەسەر چەند بەردێک کاڵایان پەڕاندوەتەوە. ئەم مەرزە وەک مەرزێکی نێودوڵەتی بوو لەوکاتەدا، چونکە ڕەزامەندی هەردوو وڵاتی لەسەر بووە لەکاتێکدا کەکراوەتەوە.
مەرزێکی لاوەکییە. کەوتوەتە گوندی (سازان) لەسەر ڕووباری سیروان پردێکی بچوک هەردوو خاکی خۆرهەڵات و باشوری کوردستانی بەیەکەوە بەستووەتەوە، کە ئێستا ئەو پردە نەماوە. لە ساڵانی پەنجاکانی سەدەی ڕابردوو هەتا ساڵانی حەفتاکان، خەڵکی ناوچەکە بەکاریانهێناوە. گواستنەوەی کەلوپەلەکان بە کۆڵ و بە وڵاخ بووە.